رحمتلیک مهندیس غلام ریضا امانی به یین حیاتینین ده ییشیب و ابدیته قووشماسینین ایل دونومو حاقدا

:
رحمتلیک مهندیس غلام ریضا امانی به یین حیاتینین ده ییشیب و ابدیته قووشماسینین ایل دونومو حاقدا

قارا خبر چاتدی آذربایجانا

یولدو ساچلارینی آغ بیرچک آنا

آراز دالغالانیب بویانیب قانا

گونش ماتمده دیر گئینیب قارا اوچ قارداشین یاسین سالیب لار جارا

امانی اوجالدی گویلره ساری

اوره کلرده قالدی اودلو آثاری

ماتمه بوروندو سئوگیسی یاری

گؤز یاشی قاریشدی اوزده آل قانا داغ چکیلدی یارالی آذربایجانا

1387 جو گونش ایلی آبان آیینین اوچونده ، جمعه گونو ساحات 11 چاغلاریندا جیب تئلئفونوم زنگ چالیر، تئلئفونا جواب وئررکن باشا دوشدوم کی جمشید به ی دیر.آمما سسی چوخ حزین گلیر سانکی بیر بویوک حادیثه اوز وئریب.نهایت خبردار اولورام آذربایجانین سارسیلماز ،آلیشقان و چالیشقان محتشم ایگید اؤغلو مهندیس غلام ریضا امانی ایکی قارداشی ایله بیرلیکده ( کربلایی جعفر و حاجی کریم امانی) ترافیک قضاسیندا آغیر وضعیتده یارالانیب و قارداشلاری حادیثه یئرینده در حال حیاتلارین ایتیرمیشلر و غلام ریضا امانی به ی ده تبریزین امام رضا خسته خاناسیندا تهلوکه لی بیر وضعیتده عمل اوتاعیندا حکیم لرین نظارتی آلتیندا ساخلانیلیب ،بو آجی خبری ائشیده نده اؤزونه دئییرسن کئشکه یالان اولایدی ،بیر آندا مین لرجه سورغو سئوال بئینیمه جالانیر اوره ییم گؤینه ییر ،اوزولوره م.ترافیک قضاسی؟! امانی ایله کئچیردییم آنلارا دالیرام آخی ائله جه ده بیزیم آرامیزدا چوخلو مناسیبت لر واریدی.بیر هفته قاباخ عائیله سی ایله بیرلیکده بیزده قوناغی دیر.قرارلاشیردیق ایکی هفته سونرا اردبیله گئدیب لیسانی به یین عایله سینه باش چکیب اونون دوستاقدان بوراخیلماسی حاقدا و گؤروشلرین نئجه اولدوغو اوچون قرارا گله ک. من بو محتشم اینسانی یاخشی تانیردیم.امانی مدنییتیمیزه ،حرکتیمیزه،یوردوموزا و بوتون وارلیغیمیزا بیر کلمه ده آذربایجانیمیزا تام وارلیغیلا ایچده ن یانان و اینانان بیر اینسانیدیر. 85 جو گونش ایلینین خرداد آییندا آذربایجان میللتینین تاریخی قیامیندا خوردادین 19ندا جمعه آخشامی گونی تبریزین اطلاعات اداره سینین تجرید خاناسیندان تهرانین ائوین دوستاقینین 209 جو بندینه اسارته آپاریلاندا مهندیس امانی اوزونه مخصوص اولان مهارتی ایله جیب تئلئفونون پالتارلارینین ایچینده ن گیزلی اولاراق گؤتوروب گونش خانیما تئلئفون آچیب بیزیم بیرلیکده(6نفر) تهرانا آپاریلدیغیمیزین خبرین دئدی. منده یولداشلارینان بیرلیکده لاله لر ماهنیسینی اوخوردوم کی امانی به یین سسی مامورلارین قولاغینا چاتماسین و ائله چوخ چکمه دی بو خبر هر یئره یاییلیب بیلیندی.

آمما بو سورغو سئواللارا باخمییاراق اوزومو چوخ تعجیلی حالدا خسته خانایا یئتیردیم.گونش خانیمی و داها بیر چوخ میللی فعاللاری گؤزو یاشلی خسته خانانین اطرافیندا حسرتله انتظار چکمکده گؤردوم.آراز(امانی به یین یادگاری)دوستلارین قوجاغیندا حیرت له بیزه باخیردی،گونش خانیم حسرت له یانیب،آغلییب گؤز لرینده ن قان یاش آخیردی.دهشتلی بیر دورومدا قرار تاپدیم سانکی قلبیم پارچالانیردی،ایچیمده شیمشک چاخیردی.جمشید به ی اوزون منه یاخینلادیر آمما هئچ نه دئیه بیلمیر ،اولدوز خانیم ذاکیر به یین حیات یولداشی آراز قوجاغیندا ماتمه دالیب.وضیعتین نئجه اولدوغونو باشا دوشوره م.باشا دوشوره م کی نئجه بیر بویوک مصیبته توش گلمیشیک. بیر بیریمیزه باش ساغلی وئریب باشقا دوستلاریلا بیرلیکده بو واختسیز وعده سیز و دهشتلی مصیبتی دوستلارا نئجه چاتدیرماق اوچون قرارلار وئریلدی.

اوستاد دمیرچی جنابلارینا و باشقا دوستلارا زنگ آچیرام. آخی اؤز گوجونه آرخالانیب و هئچ بیر باشقا گوج،دؤلت و تشکیلاتا باغلی اولمایان آذربایجان میللی حرکتی یئنه بیر محتشم ایگیدین،بیر پارلاق اولدوزون ایتیره رک یاسا بوروندو.گنج عومرونو آذربایجان میللتینین تاپدالانمیش حاقلاری یولوندا قویموش مهندیس غلام ریضا امانی اینامی اؤغروندا ایشکنجه لره معروض قالدی،حبس لر چکدی، سیخینتیلاردا یاشادی آمما سینمادی،سینسیمه دی،سارسیلمادی. آخی اؤمحتشم اینسان بو صیفت لری اؤز اجدادیندان پای آلمیشدیر. آخی مهندیس امانی بابک لرین،شاه اسماعیل خطایی لرین،ستارخانلارین،باقرخانلارین,پیشه وری لرین ,دوقتور ذهتابی لرین و... سلاله سی دیر.بو سارسیلمازلیقی و دؤنمزلیگی یوردونون تاریخیندن و قهرمانلاریندان اؤیره ندی و بوتون بو صیفت لری گنج نسلیمیزه اویره تدی. امانی میللتینین منافع نی اؤز منفعتلرینده ن اوستون توتاراق ائله جه ده دئدیکلرینه صادیق قالدیغی اوچون مینلرجه امانی لر یاراتمیش دیر.کیمسه سانماسین کی اؤ اؤلموش دور. آذربایجان وارکن،بو میللت وارکن،یاشارکن اونو و اونا تای مینلرجه سینی یاشاداجاق.آذربایجانین لایق میللتی اؤز میللی چالیشقانلارینی و مبارزلرینی اونوتمایاجاق و اونلاری تاریخ بویو یاشاداجاق دیر.آذربایجان همیشه بونو باشارمیش.امانی دونیادان کؤچورسه اونون آماجلاری،یولو،ارکانی بوتون میللتیمیزین فیکرینده و اوره گینده یاشاییر.مهندیس امانی و ایکی قارداشینین تشییع توره نینده دؤرد ساحات شیدیرغی یاغیشین یاغدیغینا باخمییاراق غیرتلی و شرفلی اینسانلاریمیز دایانمیشدیلار و <<آذربایجان سنین باشین ساغ اولسون>> شعارینین سسی بوتون مزارلیغی بوروموشدو.مسئوللار طرفینده ن برقین کسیلمه سینه باخمییاراق میللتچی لرین اؤنجه دن حاضیرلادیغی ژنراتورو ایشه سالمالاری و 7 نفر آذربایجان سئورلرین احساسلی و دویغولو چیخیشی و مراسیمین سونوندا آذربایجان مارشی و آیریلیق ماهنیسی اوخونماسی بو مقدس یولون داوام تاپماسینی آرتیق ثبوت ائدیردی.هاوا دورومونون گرگین اولدوغونا باخمییاراق آذربایجانین هر طرفیندن بو مراسیمه قاتیلانلار اولدو.ائله جه ده بو حادیثه اؤزلویونده میللی بیرلییمیزی داها آرتیق نمایش ائتدیردی.حرکتیمیزی،مدنییتیمیزی،میللی اینسانلاریمیزی و اؤنلارین خاطیره سینی یاشادییب،ده یرلی ساخلاماق و اونلارین یولونو یاخشی دؤشونوب بیلمه ک، اؤ مقدس و حاق یولون داوامچیسی اولماق هامینین میللی بورجودور.آذربایجان میللی حرکتی مدنیت اوزه رینده کوک لندیگی اوچون بو گونه قدر بوتون مراسیم لرده ساغلام شکیل ده اؤز میللی شعورون و ایقتیدارین نمایشه قویوب. امانی کیمی باش اوجا یاشامیش قهریمانلارا آغلاماق یوخ بلکه ده اونلارین سئچدیگی مقدس یولا داوام وئرمک و اونلارین آماج لارین یاشاتماق داها شرفلی دیر.

1388 جو گونش ایلی آبان آیینین بیرینده(جمعه گونو) بو شرفلی قهریمانین ایکی قارداشی ایله بیرلیکده حیاتلارین ده ییشیب و ابدییته قووشمالارینین ایل دونومو گونو مناسیبتینه قورولان مراسیمده اؤ عزیزلرین عایله عضولری ایله بیرلیکده شرفلی میللتیمیز و بوتون میللی فعال لار اشتراک ائدیب و امانی به یین عزیز یادگارلاری آراز به،دنیز خانیم و داغ وقارلی حیات یولداشی گونش خانیما باش ساغلی وئریب و مزاری اوسته چیچک سپه جکلر.یقین کی بو طنطنه لی و تاریخی مراسیمده شرفلی میللتیمیز آذربایجانین هر طرفیندن اشتراک ائدیب بیر داها اؤز وارلیغیمیزا دوغرو یوروشو اثبات ائتمکده وار گوجلرایله حضور تاپاجاقلار.

اولو تانری غلام ریضا امانی یه رحمت قیلسین

یادی همیشه لیک و یولو داواملی اولسون

چنگیز بخت آور

تبریز 1388.7.20